本屆立法會只剩番兩次大會，而下星期更要舉行行政長官答問大會，令開會時間更為緊湊。審議中有關醫務委員會《二○一六年醫生註冊（修訂）條例草案》爭議極大，喺上周三有議員不停發言同點人數搞到流會收場，若果情況無變，另外《二○一五年消防（修訂）條例草案》同《私營骨灰安置所條例草案》兩項民生議案或被「拖死」，政府於是調動議程，冀以綑綁式將醫委會改革同民生嘅草案一併通過。
由於醫委會改革嘅草案爭議大，有議員建議用「先易後難」方式，先審議爭議相對較小嘅兩項民生議案。但食物及衞生局局長高永文就曾經講過唔會撤回草案或調動議程，堅拒讓步，所以今個星期會繼續審議醫委會改革。
雖然唔會讓路，但政府其實早就另有打算，行政署長蔡潔如早喺上周三流會翌日，就去信立法會秘書長陳維安，指出消防草案審議程序仍未開始，考慮埋曾徵詢議員嘅意見，建議今個星期大會嘅議程作出改動，將原定今周恢復二讀、會期最後一項政府法案──骨灰龕場草案調前，完成審議改革醫委會後便會隨即處理，而立法會主席已經接納有關建議，將政府法案審議次序作出調動。
下周五將係今個立法會會期最後一日，若法案未趕及會期完結前通過或需推倒重來，變相繼續放生違規骨灰龕場，所以今次調動議程能夠提早處理規管私營骨灰龕場問題，但始終都要等醫委會改革嘅草案完成審議，故私營龕場規管被拉倒嘅機會仍不能排除。
政府今次調動議程嘅建議，無疑係將有爭議性嘅法案同民生法案綑綁，若然醫委會改革獲得通過，所有法案能夠一併通過，相反就會「一鑊熟」，但今次「先難後易」方式同政府、議員一路主張嘅「先易後難」背道而馳，議員會唔會乖乖配合唔拉布仍係一個未知數，政府呢個如意算盤打唔打得響，大家要拭目以待。