政情：陳曼琪晒歌喉連環甩轆
今年初退出民建聯嘅黃大仙區議員陳曼琪（Maggie），前年佔領行動曾代表小巴公司向法庭申請禁制令為人所熟悉，而事隔半年終於有新搞作，就係由前黨友、立法會議員陳鑑林（橄欖）嘅兒子陳俊傑為佢填詞同作曲，度身訂造一首名為《創新一天》嘅歌曲，盼望市民可以唔怕挑戰，重新開始。
Maggie尋日破天荒於傳媒面前初試啼聲，然而卻連番「甩轆」，首先預備「靜態版」及「動畫版」與傳媒分享播放，但於開始前，投影機突然未能顯示畫面，最後要透過電腦播放；Maggie其後拎出咪座再唱多一次，之不過可能撞正「未開聲」，Maggie似乎跟唔上新歌嘅節奏，有部分高音唱唔到，又將部分歌詞唱錯。
橄欖仔作曲填詞
至於負責填詞同作曲嘅區議員陳俊傑，原來係半個音樂人，佢識玩五種樂器，今次同Maggie合作係因為二人相識多年，當年自己結婚時仲搵對方證婚，當問及會否作歌畀即將告別議會嘅爸爸橄欖，陳俊傑話考慮吓喎。