政情：「鉛」全蝕章 依然一舊雲

白鴿區選失利仍死撐

喺鉛水風波爆發後，建制派同泛民主派政黨爭住驗水，但建制派就做多一步，搵咗一批苦主，然而一舊雲到後期先搵班苦主，搞番個「食水苦主大聯盟」正正就係因為反應慢得滯，所以搵得到嘅苦主似乎都唔夠建制派多。

由於當時臨近區議會選舉，理應會幫白鴿黨搶到唔少分，但最後結果不似預期。而喺尋日嘅新書發布會上，被問及點解選舉結果反而不利白鴿黨時，一舊雲就話都唔係吖，葵青區嘅吳劍昇咪贏咗囉！

死撐都冇用，民協同白鴿黨分別喺啟德北同啟德南出選，首先爆發鉛水事件嘅啟晴邨正正係選區範圍，但兩黨最後都係敗北而回。再講一舊雲口中嘅吳劍昇，佢確實係另一條「鉛水邨」葵聯邨，即係興芳選區成功連任，但佢其實只係險勝對手民建聯嘅梁嘉銘七十幾票咋！回顧有一晚葵聯邨開居民大會，梁嘉銘一度抱起皮膚生咗黑點嘅BB，相比之下，只係拎熱水壺嘅吳劍昇好明顯失晒勢。

黨友學精 玩政治遊戲

唔知係咪吸取咗一舊雲處理鉛水事件失誤嘅教訓，喺上月底發生嘅牛頭角迷你倉大火事件後，佢嘅黨友、立法會九龍東議員胡志偉即刻撲出嚟，好快就聯絡咗接近二百個苦主，幫佢哋索償。

就連與一舊雲同屬九龍西嘅建制派議員梁美芬，最近亦都就連鎖健身中心California Fitness分店暫停營業事件，聯同一班苦主大聯盟商討方案，打算集體向海關報案。當黨友同對手都知道遊戲規則點玩，未知一舊雲會唔會突然清醒，唔再「鬆章」畀下家食胡呢？