中環出更：上卿姐節目 李慧琼遲到
民主黨主席劉慧卿（卿姐）破天荒邀請民建聯主席李慧琼（Starry）出席由其主持嘅節目，但Starry竟然遲到約廿分鐘先到，期間卿姐一度要致電了解，Starry事後都有表示唔好意思，解釋遲到係因為要出席立法會嘅會議，加上遇上塞車及首次到白鴿黨位於太子嘅總部，所以行錯路，幸好今次係錄影節目，非現場直播，否則卿姐要對住大氣電波唱獨腳戲一段時間。
卿姐及Starry尋日於節目論盡政界熱議議題，其中卿姐問及，建制派於下屆立法會能否不再霸佔立法會內各委員會正副主席，Starry說無意亦不想霸住委員會正副主席位置，並指現時少數人騎劫議會，例如何時投票、何時開會、何時點算法定人數等，均由少數人決定，有關情況並不公平，佢又話，如果泛民答應唔會被少數人騎劫議會，可以就此再作商討。
還記得卿姐早前接受我哋專訪時話，多年來日夜都在立法會工作，無時間交朋友，但觀乎同為「南海幫」嘅卿姐同李慧琼，早前齊齊出席我哋《正反論壇》節目，尋日又一個做主持，一個做嘉賓，似乎二人都有一定共通話題喎！
卓妮