中環出更：王賢訊帶着書迷做義工
長者好多時最需要係身邊人嘅一份關心，仁濟醫院一班董事局成員早前就去到荃灣舉行派福袋活動，齊齊出動登門探訪獨居同隱蔽長者，卓妮見到仁濟副主席王賢訊派福袋時身後跟住廿幾位小朋友同家長，原來呢班係佢啲書迷，仲係第一次跟埋佢一齊做義工添！
話說嗰日每位仁濟成員手上拎住嘅福袋都印有「南山七小福」幾個字，原來係王賢訊創作嘅動畫繪本小說名稱，佢話早前喺社交網站開咗個群組，有唔少書迷都會喺群組內追問劇情同交流，仲話想搞個活動一齊出嚟見吓面。佢就覺得咁不如就做啲有意義嘅事，提議一齊做義工，群組內嘅成員亦相當贊成，於是就順利組成一個義工隊，嗰日就係佢哋成立後首次出動。
同行嘅仲有仁濟副主席嚴徐玉珊、黃美斯、葉恭正、總理孫蔡吐媚同標準工時委員會主席梁智鴻（金刀梁）等。嚴徐玉珊話最初佢哋係派米嘅，但後來發現有好多善團都係派米，加上獨居長者食量唔多，一袋米可以食好耐，所以佢哋收集意見後就決定派其他乾糧同日用品為主，方便啲長者有時唔舒服或天氣熱冇落街都可以喺屋企搵嘢食。
金刀梁爭住認後生
當日天氣炎熱，個個大汗疊細汗，但今年七十七歲嘅金刀梁依然精力充沛，上落樓梯探長者不特止，仲好有耐性陪長者傾偈，影相時攝影師話後生嘅踎前面，佢仲爭住踎，認真搞笑！
卓妮