大台有新一代「生電王」，內地模特兒界亦有一個電力美人，佢就係李筱喬，只要佢輕輕望你一眼，便會有觸電感覺，讓人明白乜嘢叫做十萬伏特嘅誘人電力。
古詩中有句「眼明正似琉璃瓶，心蕩秋水橫波清。」擁有如此動人嘅眼神，一直以為只有古代美人身上先至可以體驗得到，原來套喺今年24歲嘅李筱喬身上，竟有種非比尋常嘅貼切感。阿妹出生於上海，原名李筱筱，憑住一對電力十足嘅大眼睛而成功吸引大家注意，加上標致嘅五官，男人點會唔冧吖！有人話雖然佢樣貌出眾，但係身材就麻麻哋，小弟就唔多認同喇，佢雙峰縱然非巨乳級別，只有C罩杯，但配襯薄身波哋就啱啱好，火辣誘人，加上電力過人嘅高伏特美眸，難怪佢推出嘅寫真深受歡迎，尤其係佢喺鏡頭前表現得揮灑自如、從容不迫，輕易觸動大家嘅心。
有曾經同阿喬合作過嘅攝影師稱，最能打動到佢哋嘅並唔係阿妹嘅外在美，而係佢堅毅同堅持嘅態度，為咗令拍攝工作順利，即使帶病在身或狂風暴雨之下，佢仍然瞓身投入工作，憑住呢種專業嘅態度，令佢獲得大量工作機會，從平面媒體、電視節目、微電影，以至網絡直播節目等等都有佢份，而佢嘅微博粉絲已突破10萬之多，足見佢係幾咁討人喜歡。
須知道模特兒工作亦係青春飯，喺時間唔等人嘅情況下，想取得成功一定要把握機會，佢亦深明呢個道理，喺微博上表示：「青春，就是注定了要顛簸，要有眼淚和汗水，有委屈、不甘和失敗。」縱然佢喺工作上遇到唔如意嘅地方，或者覺得委屈時，仍然會努力做好自己。雖然佢經常自勉要堅強，但亦有忍唔住要發火嘅時候，尤其係當聽到有人批評佢嘅外形，更係無名火起三千丈，唔顧及身份而同對方展開罵戰。不過縱然係女鐵人，都會有心情失落同脆弱嘅時候，尤其喺連續忙完一個星期，每日過住朝七晚十二嘅工作之後，令佢有虛脫嘅感覺。
究竟佢忙啲乜？朝早拍攝寫真，午間拍攝平面廣告，之後錄影節目，夜晚則要進行網絡直播，如此密密麻麻嘅工作，確實難以承受得起，故此佢早前曾直言：「出售本人，活不起了。太累。」當然，呢句說話只不過係開玩笑，皆因作為一位人氣模特兒，加上性格堅忍不屈嘅佢，又點會咁容易就放棄呢？忙碌嘅工作對女性嚟講，最大嘅遺憾係感情冇着落，不過對佢嚟講卻一啲都唔在乎，皆因佢根本冇時間諗拍拖。
出生地：上海
身高：166cm
三圍：32、23、34
簡介：如果覺得李筱喬對眼電力十足嘅話，咁就可能忽略佢其他迷人嘅地方，講緊嘅係佢爽朗嘅性格，無時無刻都散發出正能量，對於經常處於勞動階層嘅男士嚟講，絕對有種重拾動力嘅魅力。想了解阿妹多啲，就要（目及）（目及）佢嘅微博喇！
網址：http://www.weibo.com/u/2041752551?is_hot=1
撰文：魂