中環出更：白鴿黨內訌 區鎮樺罷工
民主黨（白鴿黨）再爆內訌！自一月起停薪留職嘅黨總幹事林卓廷，早前有黨友不滿佢「掛名」，接受更多傳媒採訪博取曝光率後，該黨大埔區議員區鎮樺喺社交網站話，唔會到銅鑼灣擺七一街站，事關做咗咁多年，做完被人當工兵，不但冇人尊重，班兄弟姊妹在街站由朝踩到晚都冇人可憐，更不點名批評林卓廷「做過啲乜！」直斥黨高層盲撐所謂嘅總幹事，造就今日嘅結果。
區鎮樺話，前晚大埔嘅兄弟姊妹及同事都輕鬆去玩，但就有人問「聽日七一唔使做咩？」佢隨即大呻擺咗多年街站，被人當工兵又不被尊重外，直指黨高層只喺黃金時間「企幾個鐘就叫做幫咗手」，而佢哋就要早兩日執好物資，「7.1晨咁早七點出到記利佐治街霸位，跟住殺到收尾，我唔休息，班兄弟姊妹都要休息，但無人可憐你！班人仲以為好簡單好易做，今年就睇你班友做成點！」
大罵高層盲撐林卓廷
撒手不管後，區鎮樺話最後都係要黨秘書處啲同事去接手，又炮轟：「你班所謂管理層，到底知幾多，所謂黨總幹事做過啲乜！當高層盲撐所謂嘅總幹事，造就到今日嘅果！」不斷有黨友炮轟林卓廷不是，現時連每年七一街站都霸擺，睇嚟內部分裂情況日後只會愈演愈烈。
卓妮