的士係一個城市嘅名片，係人都唔想自己張名片污糟邋遢、又爛又醜嘅喇，所以咯喎，的士業如果唔想被殘酷市場淘汰，最有效辦法就係改善服務質素，重奪消費者青睞，否則做乜都係嘥氣。
係咁嘅，由於不滿政府推行優質的士計劃，多個的士團體尋日發起遊行示威，事前仲揚言會以的士癱瘓中環同圍堵政府總部，擺出一副玉石俱焚嘅姿態。但可能知道講大咗啩，遊行隊伍最終並無採取任何激烈行動，癱瘓中環並無發生，「門常開」亦可以繼續開門正常運作，就算係整個抗議行動嘅壓軸重頭戲，亦只係象徵式咁向的士潑冷水洩憤，被網民嘲諷「雷聲大，雨點小」。
即係咁，整體經濟吹寒風，的士業首當其衝，本來已經搵食艱難嘞，加上未來有新經營者加入搶食，直頭雪上加霜，業界對前景感到擔憂同徬徨，係完全可以理解嘅。之不過咁喎，有關抗議行動並未得到廣大市民支持，甚至遭到冷嘲熱諷，係咪亦值得業界反思呢？電視廣告都有賣喇，今時今日咁嘅服務態度係唔得嘅，現時的士行內良莠不齊，部分司機駕駛態度惡劣，拒載、揀客、兜路、爆粗、濫收車資等亂象屢見不鮮，唔少市民都有坐的士嘅不愉快經歷，點支持吖？
正所謂，世界潮流，浩浩蕩蕩，優化的士服務已經係全球大趨勢，市場專業化亦係好正常嘅事，情況就好似飛機有商務客位同經濟客位，火車亦有頭等車卡同普通車卡，畀唔同階層、唔同需要嘅乘客選擇，咁至係以客為先吖嘛。的士業界無反躬自省改善質素，反而遊行施壓逼政府撤回計劃，盞被人批評山頭保護主義，同世界潮流與主流民意脫節嘅咋。嗱，有網民係咁講嘅，的士業界與其參與遊行，不如改善服務仲實際啲，唔止係個別人意見o架。
話時話，的士服務泥沙俱下，點止損害乘客利益咁簡單。近年「黑的」橫行，專門向旅客埋手，濫收車資，偷竊打劫，幾狼都有，搞到香港國際形象每況愈下，「好客之都」招牌更加搖搖欲墜。雖然話呢啲敗類只係少數，但一粒老鼠屎足以搞臭成鍋粥，的士業界如果真係想自救，最緊要係自律同自省，只要乘客坐得放心又舒適咯喎，咁咪唔使驚優質的士搶客囉。
當然喇，的士業服務質素欠佳，政府一樣難辭其咎。其他唔講，家陣推出「優質」的士服務，言下之意係以前嘅的士服務係「劣質」，一竹篙打翻成船人，唔公道o架，如果改為「新型的士」或者「大型的士」，司機大佬條氣都順啲，係咪！