政情：今日你上鏡：梁姓議員坐埋一枱開餐

立法會議員梁美芬尋日搞咗個「梁氏飯局」，出席者全部都係姓梁嘅議員，包括醫學界梁家騮、街工梁耀忠、會計界梁繼昌及民建聯梁志祥。梁美芬話，今屆立法會有八位姓梁嘅議員，係人數最多嘅姓氏，而且來自建制、泛民、功能界別及獨立，政治光譜好闊，希望食完呢餐飯之後，大家可以減少分歧同增加溝通。梁美芬又透露，呢餐飯講咗兩年咁耐，睇嚟要約齊八位議員食餐飯真係一啲都唔容易。