政情：黃以謙「懶人包」解構醫委會改革
政府希望喺今個立法年度收爐前通過改革醫務委員會嘅《2016醫生註冊（修訂）條例草案》，但係醫學界反對草案建議增加四個業外人士，反建議增加同等數目嘅醫生，雙方爭持不下，仲搞到醫學會內部出現矛盾。眼見呢條咁具爭議性嘅草案迫在眉睫，本身係醫學會會董嘅精神科醫生黃以謙都好着急，亦都有感醫生未必完全掌握草案，於是搞咗個動畫版「懶人包」。
黃以謙將「懶人包」上載至Facebook，首先解釋醫委會被人批評處理投訴拖五年咁長嘅原因，又話政府建議增加業外人士，醫學界當然同意，但應該同時加番同等數額嘅醫生，咁先唔會降低醫生嘅專業意見，但係政府嘅建議，就搞到醫學界同政府對立。
倡將投訴分流
至於點樣減少處理投訴嘅時間？佢建議由初步偵訊委員會要有全職主席，仲加多個律師，以便將投訴分流，再聚焦喺啲嚴重失德嘅投訴，又話政府咁鍾意講調解，不如由初偵會將某啲認為可以調解嘅投訴，轉去調解中心。講完一大輪，始終解決唔到市民有「醫醫相衞」嘅感覺囉！