政情：郭基煇「貼地」 廣結單車友
新鴻基地產執行董事郭基煇（Adam）去年開始踩單車，踩到上晒癮，但原來當佢戴咗頭盔等裝備之後，唔少單車友都唔認得佢！不過，Adam一啲都唔介意，覺得大家都係朋友之嘛，一開始都唔知對方做乜嘢工作，即使後來講起，對方亦唔會覺得驚訝，仲話單車友其實係「好coolo架」。
組隊練車 無分你我
Adam話，覺得自己踩單車後「貼地」好多，識到一班平日唔會喺生活圈子內識到嘅人，各種階層、背景嘅人都有，日頭各自做唔同嘅嘢，夜晚聚起嚟練車組隊就無分你我，覺得單車put people together，「無論你銀行戶口有幾多個零，無論你日間做咩，一有一樣嘢大家鍾意，就好容易friend起嚟」。
Adam又話，隊友之間會互相扶持，隊友好樂意幫佢鍛煉，有時圍住香港島踩完一個圈，就一齊去茶餐廳Hea吓、食嘢吹水。睇嚟佢真係識到一班真心朋友喎。Adam下月會去北海道比賽，嚟緊亦會搵埋教練、香港單車代表隊前選手梁志賢復出一齊出賽，聽落佢相當期待，唔知今次可唔可以突破自己成績呢？