政情：議員不務正業 厚顏要加津貼
立法會拉布、流會樣樣齊，今屆立法會大會流會足足十七次，破歷年紀錄。不過，一班議員仍然膽敢獅子開大口，要求增加津貼。早前行政會議通過立法會議員及政治委任制度官員薪津獨立委員會建議，增加議員開設辦事處、辦事處營運開支及資訊科技開支，行政署尋日就向立法會提交文件申請撥款。不止申請加津貼，議員早前仲提出要放寬申領工作開支指引嘅要求，等自己使錢方便啲，公帑真係使得冤枉呀！
辦事處開支擬增至255萬
行政署尋日正式向立法會財務委員會提交文件，建議下屆立法會嘅辦事處營運開支由現時約二百三十九萬元增至約二百五十五萬元。而每位議員開設辦事處及有關資訊科技嘅開支就分別由今屆嘅二十五萬元及十七萬五千元，增至三十七萬五千元及二十六萬三千元。
因應呢項建議，行政署就向財委會申請近五百八十五萬元追加撥款及二千六百二十五萬元嘅非經常性開支，分別用以應付議員申領有關辦事處營運、開設辦事處及資訊科技嘅開支。而每屆立法會所涉額外開支就為五千六百萬元，除開計算，即係每名議員每年涉及額外開支為二十萬元，四年就八十萬元喇！
做騷成癮 有破壞無建設
加津貼不特止，其實一班議員早前更加十五分鐘極速批核，通過放寬現行《立法會議員申請發還工作開支的指引》嘅建議，包括容許議員就有關選民登記、於農曆新年以外其他節日印製應節宣傳品等申領公帑。
班議員放寬自己申領公帑就極速批核，但講起做實事，就真係有破壞無建設。舊年政改，一班建制派集體甩轆，以八票贊成、二十八票反對，否決政府政改方案，成為國際笑話；政府財政預算案亦都拉布做騷成癮，流會就當食生菜；《二○一四年版權（修訂）條例草案》更被拉布拉到胎死腹中，令本港版權條例無寸進，但一班議員仲厚顏要求加津貼，唔通啲錢天跌落嚟嘅？