中環出更：新東補選票箱失匙 搵到唔敢開
選舉管理委員會尋日公布立法會新界東地區補選報告書，提及喺二月二十九日當晚喺馬鞍山中文大學校友會聯會陳震夏中學票站點票時，發生嘅「失匙爆箱」風波，原來喺「爆箱」前，已有票站人員發現載住封箱證嘅透明膠袋內有一條鎖匙。不過，礙於未能確定係咪「失匙」，萬一開唔到鎖，可能引起在場人士胡亂猜測，故決定「爆箱」，但經調查證實係「失匙」，又指事件純屬意外，唔係有人故意干擾。
憂惹猜測 決定爆箱
既然喺票站現場發現一條鎖匙，點解唔試吓開箱呢？報告話由於唔肯定膠袋內鎖匙係咪「失匙」，萬一開唔到掛鎖，可能引起在場人士嘅胡亂猜測喎，所以投票主任認為爆箱係較為合適嘅方法。不過，事實係爆箱之後一樣有咁多猜測，否則就唔使調查喇。
選管會認為，調查結果未能確定鎖匙係由邊個工作人員放入載封箱證嘅透明膠袋，但無論如何，若投票主任當日封箱時以配備嘅索膠帶將鎖匙繫於投票箱嘅手挽上，咁鎖匙就唔會容易甩開，故選管會已指示選舉事務處必須嚴肅提示有關投票站主任遵從工作守則嘅重要性，日後要加強培訓。
卓妮