綠色先鋒：有Food同享
港少女設「社區雪櫃」，倡共享文化。社會富裕，不少家庭不自覺地購買過多食材，最終食物在雪櫃裏擺至過期，淪為垃圾。九十後少女李幸璇（Hang Shuen）在德國升學及就業，發現當地「共享經濟」的概念非常值得香港借鏡，於是趁上月短暫回港實習，於深水埗一間茶室內設立「社區雪櫃」食物分享站，讓港人將過剩的食物與他人分享。
「啲人嚟到呢個雪櫃，有多嘅食物可以放低，有需要嘅人就可以隨便拎，對雙方都有好處。」Hang Shuen一邊說，一邊打開雪櫃，裏面有瓜有菜，又有醬汁及調味料；雪櫃上方的零食架，則放滿朱古力、餅乾和薯片等，「好多人嚟之前會問可以拎啲咩嚟捐，或者問可以拎幾多走，其實所有嘢都係隨心就得。」
社區雪櫃 物盡其用
Hang Shuen早年到德國升學，畢業後於當地的傳媒機構當實習記者，而「社區雪櫃」食物分享計劃就是她實習期間的功課之一。她坦言，這個計劃的靈感源於德國的生活體驗，「當地有好多有共享元素嘅計劃，例如喺我屋企附近就有個『GIVE BOX』（分享櫃），等啲街坊將仲用得、但自己用唔着嘅嘢，拎出嚟同其他人分享，所以我就想試下呢樣嘢喺香港行唔行得通。」 Hang Shuen指，香港現有的食物銀行或由團體舉辦的剩食回收行動，受惠對象多是低收入人士，「希望打破呢種觀念，其實普通市民每個人都可以捐贈同埋受惠。」
「地點方面都要考慮，首先唔可以好似外國咁喺公眾地方擺啦，一定會畀人趕，但租（地方）又驚好難營運。」在Hang Shuen開始構思可以設置社區雪櫃的地點時，她的大學同學兼帕比安紅茶書室老闆Charlie得悉計劃，並非常認同她的理念，決定借出茶室的空間讓計劃成真，「計劃推出之後反應好好，好多人參與，希望呢個文化可以不斷延續落去。」
圖：吳康琦
文：陳名仲