內地有句俗語係咁嘅：「撐死膽大的，餓死膽小的」，意思即係只要乜都夠膽死，包保發達。嗱，家陣嘅香港就係咁荒謬嘅世界，只要你夠膽做非法嘅事，霸地又好，僭建又好，唔使餓死之餘，仲分分鐘飽死添。
呢嗱，眼下又有一宗僭建致富事件發生嘞。係咁嘅，沙頭角塘肚村一條看似平平無奇嘅排水渠，原來暗藏玄機，多年來被人違規加高地台，僭建電線及電燈，搖身一變成為長九米、高兩米、闊三米嘅「行人隧道」，連接到一個生態農莊，成為遊客必經之道。呢個生態農莊○九年開業，專攻本地學校及團體，幾乎每星期都有活動，直頭車水馬龍，客似雲來。
咁問題亦隨之而來嘞。話明係排水渠，作用當然係收集雨水，再經暗渠排放啦，家陣變身行人隧道，萬一遇上山洪暴發，都咪話唔牙煙。唔係危言聳聽o架，早排又黃雨又紅雨，本報記者冒住生命危險去現場視察，發現「行人隧道」中間僅由一幅石牆間開，靠近河流嘅一邊渠道有大量洪水湧入，萬一山洪暴發，後果不堪設想。去過農莊嘅學生家長都話，職員帶佢哋行「行人隧道」出入農莊，當時已經覺得奇怪，事後知道係排水渠即刻嚇到腳都軟埋。冇錯，去農莊休閒啫，唔使搵命博嘅。
唔係嚇你，以前都試過有新界村民被山洪捲走而喪命。呢，月前一對外籍姊弟喺沙頭角屏南石澗遇險，只係短短三秒，洪水就大量湧至，兩姊弟走都走唔切，最後僥倖獲救係好彩咋。咁你話喇，排水渠畀人非法僭建改裝做行人隧道，係咪即係攞市民條命較飛吖？渠務署咁多年都唔執法，咁咪即係變相鼓勵吖？
聽下渠務署點解釋先。佢哋話喎，現時無定期巡查全港排水渠嘅機制，對於有關排水渠被人僭建改裝毫不知情，但今年三月收到市民投訴後已加設警告標語。喂，家陣講緊排水渠被人非法僭建，危及市民生命安全，求其加個警告牌就了事，有冇再兒戲啲吖？正如立法會議員話齋，唔係個個市民都知排水渠咁危險，渠務署闊佬懶理，簡直草菅人命。好彩咋，經本報介入後，渠務署終於知衰，拿拿臨加設圍欄同埋扑碎地台，呢啲咪叫四方木，唔踢唔識郁囉。
大家睇到喇，今時今日嘅香港僭建橫行，霸地處處，根源就係官僚冇心冇肺冇靈魂，完全冇做好自己份工。如果唔係，點會有前高官及富豪霸佔官地僭建豪宅長達三十年都冇人理嘅醜聞吖？所以話，香港勝在有第四權，如果冇咗傳媒監督，社會都唔知亂到咩地步咯。