相信大家都經常見到，一批議員喺立法會咪兜前講嘢、舉行記者會等，但隨着今屆任期結束就冇呢支歌仔唱嘞！
事關立法會行政管理委員會尋日決定於七月十六日，即立法會換屆選舉提名日起至九月四日投票日，立法會將停止運作，期間不論現任議員係咪競逐連任，都唔容許繼續用立法會大樓嘅設施，作與競選有關嘅活動，例如會見選民同接受傳媒採訪等，以確保唔會因議員身份對選舉造成不公平優勢，而喺呢段期間亦會撤走咪兜。
行管會仲話，如果發現有違規事件，立法會秘書長會先行制止，跟住發聲明同譴責有關行為，而違規行為會以附本交畀選舉管理委員會同廉政公署添！
咁匿埋喺辦公室搞選舉嘢又得唔得？答案係唔得，但可以投訴。話雖如此，喺呢一段時間，各黨派議員基本上都做緊大同小異嘅嘢，投訴對家嘅話，揚開晒咪即係倒自己米，邊有人會咁蠢，所以話呢，行管會今次似乎係無牙老虎居多。
另外，選舉事務處總選舉事務主任李柏康尋日於立法會一個委員會，回應議員提問時強調，若果現任特首競逐連任或問責官員要參選都唔可以用公家資源助選，但車、秘書同官邸都係平時用開可以繼續用，但不可作選舉用途喎。