政情：鄭文聰招兵 鍾情科大生
本港唔少行業均同多間大學相關學系緊密合作，希望培育更多生力軍加入，其中工業總會主席鄭文聰前日出席科大廿五周年活動時話，自己同科技大學好有淵源，請咗唔少科大畢業生做夥計，唔通佢對科大嘅畢業生情有獨鍾？
力推環保工程
主力以工業科技推動環保嘅鄭文聰表示，未有科大之前，本港好少學生報讀化工，多數都係到外國就讀有關科目，然後來港工作，而自從科大於九十年代初成立以來，佢自此從中物色到唔少好人才，因而請咗好多科大畢業生。
除咗專注於做生意，鄭文聰於培育人才方面都出唔少力，佢話自己早年曾經幫工程師學會，設計環保工程嘅課程，起初報讀嘅人數唔係太多，但經過一段時間後，就愈嚟愈多人報讀，加上依家有關環保工程嘅工作開始「吃香」，該課程亦愈來愈受歡迎喎。