政情：立會處子騷 「章」法大亂

還記得十多日前，政制及內地事務局局長譚志源於立法會回應議員口頭質詢，多個黨派由「女士之夜」衍生多個對性別歧視場景嘅疑問，譚志源當日被議員問到口啞啞。事有湊巧，陳章明尋日首次以平機會主席身份現身立法會政制事務委員會匯報工作，政制局只派出代表出席呢個討論項目，唔見政制局署理局長陳岳鵬嘅身影。換言之，全程幾乎由陳章明唱獨腳戲面對合共九名議員圍攻。

被疑就女士夜搵酒吧開刀

其中首先出招嘅係本身非委員會委員嘅張宇人，佢除咗當面質疑陳章明，尋日出席會議嘅平機會同政制局高層冇婦女同少數族裔外，又把矛頭對準「女士之夜」一事，質疑陳章明搵酒吧來「開刀」，要求對方交代平機會用咗幾多錢檢控酒吧，否則揚言將來平機會問立法會拎錢時，會用「放大鏡睇盤數」。陳回應時稱，如商業營運以性別作為價錢嘅落差，已牴觸相關歧視條例，而將女性當商品，原則上都係錯。

緊接炮轟平機會係身為大律師嘅商界議員廖長江，佢表明希望陳章明可以解釋清楚規管「女士之夜」嘅原則，反問如果三八婦女節時，婦女有折扣或獎賞，又或商場女廁數目多過男廁，又會否涉及歧視。佢同時關注，平機會去年嘅法律費已超出政府補助額嘅三倍，今年可能達至四倍，質疑平機會係基於甚麼原則，喺超支愈嚟愈多嘅情況下仍要進行好多無謂嘅訴訟。陳章明喺多次追問下，只係話每宗個案都有唔同，好難介定促銷定歧視意圖。

失言遭重提 左右不討好

對於陳章明拍晒心口會推動《性傾向歧視條例》立法，建制派議員梁美芬就勸對方唔好將個政治炸彈攬上身，批評立法只會製造社會撕裂。除建制派，多名泛民議員亦不滿政府委任陳為平機會主席，唔少人仲喺會上重提陳誤以為「老同」為同性戀人士嘅瘀事，難怪陳愈答愈口窒，相信呢次上立會嘅經驗都好難忘。