中環出更：郭芙蓉「飛甩」高佬賢
本報早前收到投訴，指民建聯（民記）立法會漁農界議員何俊賢（高佬賢），挪用公帑「包養」新當選嘅葵青區議員黨友郭芙蓉。高佬賢當時話做助理唔一定要留喺立法會工作，又希望繼續聘請郭芙蓉。原來喺事隔兩個月後，郭芙蓉已向區議會申報辭任高佬賢辦事處研究員，唔通高佬賢留唔住郭芙蓉？
爆「包養」風波後辭任議助
話說有讀者喺舊年十二月向本報投訴，話高佬賢申報立法會開支，用嚟支付聘請郭芙蓉做議員助理嘅人工，又指郭芙蓉後期已經無返立法會同參與漁農界工作，但仍全額支取議員助理工資，即係「包養小花郭芙蓉去準備二○一五年區議會選舉」。但我哋翻查郭芙蓉個人利益登記表，發現佢申報今年二月一日起，終止擔任高佬賢辦事處研究員。
高佬賢解釋，由於郭芙蓉當選區議員後，需要專注地區工作，所以就辭職唔做，佢對此都表示認同。雖然係咁，由於郭芙蓉係民記衞生事務副發言人，同佢都經常喺衞生議題有所合作，只係雙方冇咗僱傭關係，而郭芙蓉會成為佢嘅「義工」。不過民記衞生事務發言人係另一立法會議員陳恒鑌，相反高佬賢係食安及環境衞生事務發言人，如果雙方要合作，似乎要合辦議題先得喎。
卓妮