中環出更：IT人冇工開 「楊」言做中介
早前有報道指IT界失業率增加，有大公司相繼削減資訊科技部門人手，最新資訊及通訊業失業率更升至百分之二點六，但另有指今年與行業相關科目畢業生人數供不應求。咁啱卓妮尋日喺香港中華科學與社會協進會二十周年慶典暨青年委員會成立典禮上，見到香港軟件行業協會會長楊全盛（Eric），佢解釋呢個現象係因為IT界範疇好廣闊，單係做技術支援同寫程式嘅工作已經可以好唔同，而現時市場則對後者比較渴求。
Eric話現時市場對於識寫手機APP同遊戲程式嘅人才需求依然好大，笑言如果係呢類IT人搵唔到工嘅可以嚟搵佢，佢一定介紹到工畀佢哋做喎！咁做開技術支援嗰班又點算？佢就話技術支援人員一定要追到IT日新月異嘅發展，做耐咗都要不斷學新嘢先可以保持競爭力，所以佢哋嚟緊就諗住同幾間大公司合作開班免費教授VR（虛擬鏈境）同編寫遊戲程式，希望幫到一班遇到樽頸嘅IT界員工，等佢哋透過增值自己轉型，改善情況。
李宗德：業內或人才錯配
曾經做過應用研究局董事局主席嘅和富社會企業會長李宗德就認為，呢個行業百分之二點幾嘅失業率其實算低，當中可能包括剛畢業嘅學生同剛離職嘅人，算係自然流動，而現時好多行業都有「有人冇工做，有人請唔到人」嘅情況，可能係求職者志願或與僱主期望出現錯配。
該會主席蔡冠森嘅大仔蔡雋思亦加入成為該會青年委員會主席，蔡雋思話明年開始每年暑假都會同中科院合作，挑選香港學生到內地科研機構實習，並提供平台畀中學生、大學生、老師同行內企業家交流接觸。
卓妮