古人話，德不稱其任，其禍必酷；能不稱其位，其殃必大，真係一啲都冇講錯。家陣社會立立亂，就係拜港府官員無德無能所賜，尤其係有名你叫「唔得掂」嘅教育局局長吳克儉，喺佢老哥揸旗下教育爭議一浪接一浪，唔到你唔服。
話口未完，尋日立法會教育事務委員會嘅公聽會又出事喇。係咁嘅，會上討論大學校監委任制度問題，議題本身已經夠晒惹火，加上吳克儉表現拙劣，結果議事堂上炮聲隆隆，淪為眾矢之的，學生代表及與會團體狂轟佢淨係識去旅行睇櫻花，叫佢咪阻住地球轉，快啲落台喎，都咪話唔面懵。
又難怪學界反應咁激烈嘅，事關吳克儉上任以來點止一事無成吖，直頭添煩添亂喇，由國民教育胎死腹中開始，政策推出一項跪低一項。好似最近佢推銷「一帶一路」十億獎學金咁吖，一味叫人為學生福祉着想，但到底學生有乜得着又講唔出，反對派固然反對，連建制派議員都撐唔落去，批評政府所託非人。眼看闖關變撞牆，政府惟有死死氣話「民生先行、先易後難」喎，咪即係舉白旗投降咁解囉。
吳克儉被指能力低都係其次，最惡頂係佢老哥不務正業。冇冤枉o架，就講TSA爭議吖，學生、家長、教師怨聲載道，佢不但冇撲火降溫，反而跑到日本梳乎，又賞櫻花，又食放題，仲欣賞當地美女添，咁嘅態度，唔畀人鬧爆至奇。仲有吖，早前城大綠化天台倒塌，差啲搞出人命，佢竟然話本來諗住放假好舒服，暗示事故令佢假期泡湯，有冇再涼薄啲吖。
講起呢幾年嘅教育亂象，真係十隻手指都數唔晒，淨係一場紅雨咋，都可以搞到七國咁亂，唔怪得每次問責官員民望調查，佢老哥都係包尾大幡喇。最諷刺嘅係，次次搞出鑊，呢位大男人就習慣性匿喺「好打得」嘅政務司司長林鄭月娥身後，裙腳仔形象深入民心，簡直唔知醜字點寫。
不過咁，吳局長都唔係一無是處嘅，起碼講到旅遊外訪同埋知識淵博，佢認第二，冇人敢認第一。有數得計，佢上任以來，出國考察多達三十七次，耗費二百多萬元公帑，足迹遍布七大洲五大洋，想唔認係旅遊達人都唔得喇。至於佢月覽三十本書嘅言論更係一鳴驚人，博學程度媲美一目十行、過目不忘嘅張松，簡直係不世嘅奇才。
所以話啫，天生我才必有用。吳局長搞教育固然一塌糊塗，誤人子弟，但如果佢即刻轉行做導遊或者圖書館管理員，話唔定可以發光發熱，成為業界奇葩，諗得過o架！