政情：公民講場：優質的士 收費好藝術

政府推出優質的士計劃，但未睇到有幾優質之前，已經惹來業界反彈，狠批當局搞分化，而批出新牌照更影響舊有的士牌價。運輸及房屋局局長張炳良尋日出席電視節目時，口講就話優質的士唔係要取代或懲罰現有的士，但就話優質的士以專營權營運可令政府在規管上更有保證，仲閂定後門話現有的士轉為優質的士嘅問題複雜，好難做到。如此看來，當局有意逐步規管的士行業，由大財團以專營權方式營運。講到優質的士嘅收費模式，張炳良仲形容係一項藝術，藝術確係高不可攀，唔知市民要為呢門藝術付出幾多錢呢？