政情：有相為證：新思維直幡連環「遇襲」

新思維橫額、直幡接連被破壞！新思維秘書長黃俊瑯（Caspar）話，幾個星期之前，佢哋喺旺角掛咗十幅新思維橫額，點知最後剩番一張，其餘嘅都不翼而飛。到前幾日，佢哋喺石硤尾豎立嘅十支直幡，最後又係離奇失蹤。直至尋日，新思維再喺石硤尾擺街站，同樣豎起多支直幡，點知義工食完晏返去街站，就發現啲直幡全部拗曲「下半旗」，咁大整蠱，唔知得罪咩人呢？Caspar話都唔知點解，但討論過後唔打算報警，因為查得嚟都唔知幾時先有結果喎，惟有下次小心啲，擺完街站就即刻拆走啲直幡，費事渣都無埋。