政情：捕捉櫻吹雪 項明生教路
櫻花香港都有幾棵，但要睇櫻吹雪嘅情景，始終都係去日本先至睇到。旅遊達人項明生（James）早前拍咗個旅遊節目，以日韓台櫻花為背景，仲出咗本書講述於日本東北賞櫻見聞。James話，要睇到櫻吹雪並唔容易，須於櫻花滿開之後三日，風吹過時大量櫻花花瓣飄落才會出現猶如落雪嘅畫面，而佢哋今次係好難得先拍到呢個情景。
日本東北人流少揸車方便
不過，近年日本成為港人及內地人旅遊熱點，東京、大阪等旅遊旺區更係逼人到爆，尤其賞櫻季節，分分鐘大人只係睇到其他人後腦，細路就只睇到大人屁股。所以今次佢就揀咗去日本東北嘅新潟、山形、秋田及青森縣，呢幾個地區揸車比較方便，人流少啲。
James話，日本人對櫻花花開花落嘅情況有多年詳盡記錄，花期期間亦會每天更新花開進度。仲話日本真係有專人每日喺度數住棵櫻花每日開咗幾多朵，一百朵入面開咗三十朵就開三分、開五十朵就開五分。相比之下，到台灣及韓國賞櫻就要講運氣，因此更難遇到櫻吹雪嘅浪漫一刻。