政情：曾蔭權密會馬英九見光死
貪腐醜聞纏身的前特首曾蔭權爵士，上月借去英國睇眼科醫生為名，缺席全國人大委員長張德江的晚宴，其實是為免留港丟人現眼先避走英國。唔知係咪去開外地有癮，曾蔭權近日被揭秘密訪台，前日同台灣的前副總統蕭萬長食飯後，尋日原本打算同前總統馬英九食午飯，點知走漏風聲「見光死」，最後臨時取消會面。雖然馬英九辦公室隨即發出嚴正聲明，否認會面傳聞，但空穴來風未必無因，唔通兩名港、台前領導人物，諗住秘密商議退休後大計？
據台灣傳媒報道，陸委會證實曾蔭權確係身處台灣，預定明日離境，赴台係為咗探望繼母及探病，但就無公開其他行程。不過，當地傳媒揭發佢前日同蕭萬長食過飯，尋日本來打算同馬英九喺新北市汐止山區一間高級餐廳食午飯，據稱係透過一位姓林嘅企業家代為預訂一張十二人大枱，但疑因走漏風聲而臨時取消，之後有無改地方會面就不得而知喇。
繼續發揮奢華本色
據了解，呢間餐廳隱身喺汐止山區嘅日式庭園，充滿禪意，人均消費以千元起跳，而且仲要在兩個月之前預約。曾蔭權同馬英九秘密會面都要揀一間高級餐廳，真係不忘發揮奢華本色。馬英九辦公室尋日傍晚隨即發出嚴正聲明，並以「子虛烏有」、「憑空捏造」否認會面傳聞，但唔知係咪密會一事被揭露後才予以否認。馬英九早前計劃申請來港演講，但被現任總統蔡英文駁回，唔通佢來港期間都打算密會曾蔭權？
借探親訪台非首次
話時話，曾蔭權已經唔係首次被揭發秘密訪台，早喺二○一三年，曾蔭權夫婦以私人身份訪台，話去當地探親同參觀，但唔知點解獲台灣陸委會港澳處安排專人招呼，仲要畀埋特別通道禮遇佢過關。雖然唔知上次係有人提出要求定人哋主動款待，但今次曾蔭權擺明係借探親為名，然後周圍同台灣的前領導層食飯，不知用意何在，但密會之事一見光，馬英九方面即劃清界線，睇嚟都唔慌好嘢喇！