中環出更：教下屆立會做嘢 一舊雲被寸爆
立法會教育事務委員會召開特別會議，討論大學教育資助委員會院校嘅管治事宜。民主黨議員黃碧雲（一舊雲）會上提出動議，要求下屆立法會教育事務委員會跟進尋日會議嘅討論，此舉等於教下屆立法會做嘢，根本無約束力，講嚟都嘥氣，結果被事務委員會主席林大輝寸爆：「下屆議員唔需要理你！」
議員「唔需要理你」
大輝話，議員動議對下屆（第六屆）立法會係無約束力，即使一舊雲連任下屆議員，下屆議員「都唔需要理你」，更稱「咁你唔寫埋第七、第八屆？」惟一舊雲就話下屆理唔理係另一回事，但佢會堅持此動議。大輝就反問點解唔動議今屆立法會跟進？議員何秀蘭亦勸一舊雲更改動議內容，惟一舊雲好堅持，解釋今屆立法會已無時間跟進。
不過，由於會議的法定時間已到，會議室亦無足夠人數表決，召喚議員需時，一舊雲最後只要求把動議記錄在案，並叫秘書處促請下屆立法會跟進喎，真係得啖笑。下屆立法會係咪會跟進，依家根本無人控制到，就如大輝下屆都未必能夠再當選議員、在教育事務委員會「揸fit」一樣。