開講有話，狗咬人唔係新聞，人咬狗至係新聞，立法會有名你叫垃圾會，唔係拉布就係流會，大家已經見怪不怪咯。之不過咁，立法會近日又流會，亦係本屆立法會第十七次流會，今次同以往就有少少唔同，值得研究一番o架。
話說立法會前日審議稅務（修訂）條例草案，反對派例牌點算人數，結果得三十四人蒲頭，差一個至夠數，流會收場。過去流會主要係因為議員蛇王缺席，導致人數不足而流會，不過今次唔同，當時立法會大樓內有五十多名議員在場，點人數鐘聲足足十五分鐘，就算蝸牛爬都爬到去會議廳喇！
姑且聽下班政客點解畫，有人話要去開會，有人聲稱見實習生，有人賴接受訪問，總之就係懶人多藉口，一個二個老定得滯，你旨意我我旨意佢，結果就搞成咁嘞。咁就好笑嘞，返工都可以搵同事代勞，出糧又唔見你搵人代出！
仲有喎，以前政客玩拉布流會，主要針對有爭議議題，懶義正辭嚴咁話要阻止不公義議案喎，今次處理嘅稅務條例冇乜爭議性，咁都玩缺席，唔係懶到出汁又係咩吖！大家有眼見，政客平日就算難得出席議會，都係心不在焉，唔係辦私事就係剪指甲，唔係睇AV就係搵周公，依家仲索性唔現身，連行屍走肉嘅軀殼都懶得擺出嚟，佢哋究竟係民意代表，定係懶蟲代表，畫公仔唔使畫出腸喇啩。
話時話，今屆立法會步入尾聲，換屆選舉在即，照計班政客點都要扮下嘢博選民好感啩，點知班大哥一於少理，照流會可也，你叫市民點撐得落吖！可能有人話，嗰班霸住茅坑嘅老屁股表現咁惡劣，選民用選票懲罰佢哋，選過班新人上場咪得囉。理論上係咁，事實只會令人更加失望，香江政客一代不如一代，一蟹不如一蟹，呢屆多垃圾，下屆只會有更多奇珍異獸。好似嗰位有望出戰九月選舉嘅「乳鴿」區議員咁吖，最近被爆利用區議會實報實銷津貼，向三名助理發放合共接近十二萬元巨額花紅，直頭當納稅人係提款機。大家話嘞，年輕一輩政客未入立法會已經濫用公帑，一旦畀佢哋選到，仲唔舔到盡咩。冇錯喇，千里為官只為財，政棍亦係一樣，佢哋千方百計鑽入議會，你估真係為人民服務咩，講到尾咪又係貪份高薪厚祿。
計功夫茶話齋，垃圾會政棍有破壞冇建設，論監察政府施政，表現遠遠不如作為社會第四權傳媒，與其繼續浪費公帑養懶蛇，不如摺咗垃圾會，幫庫房慳番筆之餘，市民又可以耳根清淨，一舉兩得，你話幾正吖！