有人話做人只要有夢想，就已經為成功埋下種子，而根據已故國學大師季羨林所講，成功要有天資、勤奮同機遇至得。不過咁其實仲未夠，最緊要都係要有自信，只要有自信踏出第一步，就已經成功咗一半，內地新進寫真模特兒馮木木正係其中一個好例子。
嚟自湖南長沙嘅22歲馮木木，英文名Lris，雖然係一位新進寫真模特兒，但佢喺鏡頭前卻一啲都冇怯場，除咗因為佢喺投身寫真界前，已經喺私拍界打滾咗一段日子，積累咗相當拍攝經驗外，更因為佢畢業於湖南女子學院藝術表演系，經過專業訓練加上豐富經驗，面對鏡頭擺甫士可謂駕輕就熟，展現出個人魅力。
阿妹唔單止擁有迷人美貌同火辣身材，一把清爽短髮更係個人標記，唔會令人覺得佢太過男性化，反而散發出獨特氣質。除咗對外形充滿自信外，佢筆挺嘅鼻樑更係最值得自傲嘅地方，縱然有唔少人懷疑佢嘅鼻樑經過後天加工，但佢卻懶理其他人嘅評論，因為佢相信事實勝於雄辯，愈反擊就愈惹嚟更多人起哄。佢雖然出道短短日子，但係人氣相當高企，除咗拍寫真之外，亦同時喺多本雜誌中亮相，又以車模身份出席各種車展活動。此外，佢更被教育諮詢公司睇中，邀請佢擔任形象顧問，足見佢深受歡迎。
雖然演出經驗豐富，但係佢覺得自己仍有不足嘅地方，為咗提升實力，佢積極參加唔同嘅比賽，好似最近佢參加咗時尚模特兒大賽及足球寶貝選舉，雖然未有獲得獎項，但相信粉絲們仍然會繼續支持佢。此外，佢又積極接私拍工作，可能有人會問以佢現時嘅工作量，乜仲有時間接私人工作咩？阿妹表示為咗令自己進步，縱然係辛苦，都唔可以停落嚟，否則不進則退。
大家除咗關心佢嘅工作外，更加關注佢嘅感情世界，不過現時以工作為重嘅佢，睇怕都應該冇乜時間拍拖。另外，佢喺微博話：「別忘了答應自己要做的事情，別忘了答應自己要去的地方，無論有多難，有多遠。」佢所指要去嘅地方雖然冇講係邊度，但可以肯定佢嘅目標係先要喺模特兒界做出好成績。佢曾經引用俄國著名作家屠格涅夫嘅說話，嚟表明自己對事業嘅追求，就係「幸福沒有明天，也沒有昨天，它不懷念過去，也不嚮往未來，它只有現在。」
簡介：既係一位模特兒，又係一位形象顧問，阿妹所展現出嚟嘅唔單止係極具個性嘅魅力，更可以從佢身上搵到自信嘅泉源。如果大家想深入認識佢嘅話，就Click上佢嘅微博睇睇啦！
網址：http://www.weibo.com/u/3035298807?is_hot=1
出生地：湖南長沙
身高：165cm
三圍：33、24、34
撰文：魂