政情：歐國盃撞正拉布 議員齋噏唔睇得

資訊科技界議員莫乃光就話，歐國盃開鑼至今一場都未睇過，佢大嘆頭場晚上九點鐘開波，時間太早未返到屋企，而夜場又太夜，看來議員工作都幾繁重。雖然莫乃光無睇波，但睇得出佢對歐國盃都幾熟悉，起碼噏得出今屆有多場都是八十幾分鐘先有入球玩絕殺，但就拒絕講心水冠軍喇，因為仍在分組賽階段，而且未見一隊突出喎。

「戀英情意結」湧現

漁農界議員何俊賢（高佬賢）就話，歐國盃太夜開波，為了健康着想都費事捱夜，但決賽一場半場就另作別論喇！高佬賢曾經留學英國，所以講明會支持英格蘭，仲大爆朋友笑佢似前英格蘭國腳高治添！有「長人」之稱的高治身高有成兩米零三，論高度及手長腳長的身形，身高逾一點九米的高佬賢又真係同「長人」有幾分相似喎。

高佬賢睇好德國

雖然高佬賢鍾情英格蘭，但他就非常理性分析英格蘭不會捧盃，因為英格蘭經常去到淘汰賽初段就出局，而且最強一屆就是九八年世界盃，即使有碧咸、奧雲、舒利亞都無功而還，所以今次都很難笑到最後喇。到底佢有咩心水呢？高佬賢就話睇好德國，又話比利時同匈牙利不容忽視。

至於最近是非纏身、又忙於湊仔的議員陳恒鑌（Ben）就大嘆邊有時間睇波，但他自稱是紅魔鬼擁躉，而國家隊方面就捧開荷蘭及英格蘭，但由於荷蘭今次未能入圍，就可以一心支持英格蘭喇。同樣大呻無時間睇波的會計界議員梁繼昌，同樣睇好英格蘭，話陣中有不少表現出色的球員。

個個議員講起歐國盃答得頭頭是道，但因為工作或開會而無精神捱夜睇波，受影響的泛民議員都話因為盟友拉布拖累無得好怨，但建制派議員就認真無辜喇！