宜將剩勇追漢奸 痛剿淫媒學霸王

即係咁，人稱「漢奸黎」嘅黎智英旗下《壹週刊》遭霸王國際集團控告誹謗兼索償，上月被判敗訴，賠款三百萬元，雖然霸王最終討回公道，但商譽掃地，市場萎縮，股價蒸發，區區賠款，連九牛一毛都講唔上，當局高高舉起，輕輕放下，簡直離晒大譜。

之但係如果漢奸黎以為有港英餘孽照住就可以避過懲罰咯喎，咁就大錯特錯嘞，事關好戲在後頭，繼前日約三十名霸王員工以及關注組成員到壹傳媒大樓以及漢奸黎屋企踩場，尋日下午「撐霸王集團關注組」又拉大隊去黎宅，佢哋手持「六年沉冤終昭雪，討回公道還清白」橫額，高叫「無良壹傳媒，媒體黑社會」等口號，聲勢浩大，喊聲震天，漢奸黎睇怕有得震冇得瞓。

又難怪示威者咁㷫嘅。好似有苦主咁吖，多年前購入霸王股票，點知霸王遭誹謗後股價大插水，損失慘重。冤有頭，債有主，唔搵漢奸黎算帳搵邊個？

正所謂多行不義必自斃，漢奸黎做得陰騭嘢多，新仇舊恨自然一擁而至。除咗霸王聲討義軍，早幾日漢奸黎大宅及壹傳媒大樓外亦遭「錦衣衞」五漢拍門，進行拍攝，而最蹺蹊嘅係，有人嚇到變鵪鶉，一度唔敢報警。鬼咩，漢奸黎牙齒印多到分唔清邊個打邊個，警方、廉記以至內地「強力部門」，瓣瓣都有可能！唔理點都好，出得嚟行，預咗要還，呢類上門「追數」嘅事件肯定陸續有來。

話時話，如果港府有法必依，執法必嚴，使乜民間義士出頭吖。大家有眼睇，壹淫媒長期宣淫販賤，反中亂港，臭史仲長過阿婆條紮腳布，第樣唔講，漢奸黎被指幕後策劃佔中，又捲入黑金醜聞，當局查來查去都係得個吉，話冇人包庇喎，三歲細路都唔信喇。好在人間自有正氣在，仗義每多屠狗輩，早前有三名男子實行「違法達義」，憤而向喺金鐘佔領區「私家皇座」扮指揮嘅漢奸黎投擲豬內臟，身陷囹圄在所不惜。官府做唔到嘅，要由霸王同民間義士待勞，你話係咪諷刺吖。

一物治一物，糯米治木蝨。明代錦衣衞神龍見首不見尾，清代血滴子殺人於無形，當今嘅「強力部門」甚至有本事令人以自己方式離港，一個比一個犀利，如果漢奸黎有朝一日以自己方式消失，為社會除一大害，市民肯定拍爛手掌！