政情：甩轆停不了 嫻姐又投錯票
立法會尋日三讀通過《二○一五年截取通訊及監察（修訂）條例草案》，條例草案喺審議期間，建制派同部分泛民議員都話會支持草案，但喺最終三讀投票時，工聯會陳婉嫻疑似「重複犯錯」，投下反對票，成為唯一投反對票嘅建制派議員。嫻姐事後話，唔知道自己投錯票，喺記者提醒下先發現，佢又話因為太忙所致，係無心之失，向大家講聲唔好意思。
稱區務忙 屬無心之失
其實嫻姐都唔係第一次投錯票，上次佢喺《物業管理服務條例草案》中，三讀投票時都投錯票。當時佢即刻話自己喺度整理公務，亦有指可能因為喺有關財政預算案嘅修正案投票時，曾經封住贊成票按鈕，避免出錯支持泛民嘅修正案，豈料最後慣咗手勢喺三讀時投錯反對票。至於尋日又投錯票，到底係佢再一次慣咗手勢、真心反對條例草案、定係因退休在即，成個人都變得鬆懈而導致投反對票？
嫻姐事後解釋，因為今日比較忙碌，亦承認唔係第一次投錯票，但佢否認因為工作疲倦而導致出錯，並指因處理區內事務比較忙，係無心之失，再次向大家講聲「唔好意思」。