政情：新加坡媒體讚港鐵出色
近年港鐵經常發生故障，備受市民批評「只知加價，唔識改進」。不過，一向同香港有競爭關係嘅新加坡，就有當地傳媒讚港鐵做得好。最近新加坡《海峽時報》就刊登一篇文章，比較新加坡、台北同香港嘅地下鐵路，結論係港鐵營運嘅鐵路系統相比另外兩個城市仲大、仲舊，列車班次和營運時間亦比台北捷運多，咁樣自然會令港鐵更難達到預期嘅列車服務可靠程度，但港鐵依然表現出色。
文章指，去年港鐵列車平均每三十六萬載客車卡行車公里先遇到延誤，若計導致服務延誤達三十分鐘以上嘅大型延誤事故，就只有八宗，相比起新加坡嘅廿九宗，以及同樣有高載客量嘅東京地下鐵嘅三十九宗，港鐵嘅大型延誤事故數目仲少！港鐵主席馬時亨聽到星洲傳媒咁讚法，相信會好高興。
港鐵現時每日接載乘客超過五百五十萬人次，準點率維持百分之九十九點九，表現比世界好多城市的地鐵都要好，好多境外嘅朋友到香港，都對港鐵讚不絕口。有人話，港鐵無疑有唔少地方可以做得更好，但都唔應該完全抹殺港鐵嘅成績，應該從客觀事實評價港鐵。