社會上對性傾向歧視條例是否立法爭議不休，多個反對立法嘅團體乘着平等機會委員會尋日召開例會踩場抗議，其中一個名為維護家庭價值關注組係新成立嘅團體，召集人正是身兼平機會委員、民建聯離島區議員周浩鼎，聲言反對同性婚姻合法化。而另一個團體則係由香港眾志秘書長黃之鋒爸爸黃偉明任召集人嘅「性傾向條例家校關注組」，估唔到周浩鼎與黃偉明竟然站喺同一陣線。
周浩鼎作為平機會成員，可謂係近水樓台，佢任召集人嘅維護家庭價值關注組首先到場，並拉起橫額及高呼口號，佢指同性婚姻合法化涉及倫理關係，對社會帶來衝擊。可能因為係「自己人」嘅關係，平機會主席陳章明親身接收周浩鼎嘅請願信，認真「畀面」，但隨後踩上平機會嘅愛護家庭家長協會，只係由周浩鼎接收請願信；而黃偉明嘅關注組待遇相對較差，只由平機會職員接收請願信，足見親疏有別。
黃偉明指出，性傾向條例家校關注組於三月中曾親身向平機會遞交意見書，但事隔三個月平機會仍未回覆，質疑意見書被丟入垃圾桶，又批評陳章明對立法嘅立場反覆，搖擺不定。