中環出更：文房四寶「培」伴揮毫護非遺
咪以為科技進步咗，已經好少人寫書法，其實愈來愈多人學書法至真。裕華國貨尋日舉行《台灣文房四寶展》，推廣及展示台灣四大名家嘅毛筆、墨條、宣紙及硯台，仲有台灣著名書畫家馬水城及書法家鄭培凱即場揮毫。身兼香港非物質文化遺產諮詢委員會主席鄭培凱話，寫大字已同生活無關，雖然書法已經「瀕危」，但近期又流行番，而且變成一門藝術，佢鼓勵大家得閒寫吓字，保護呢個非物質文化遺產。
裕華董事總監余偉傑（Andrew）都話，香港愈來愈多人學書法，佢哋近期搵名家開書法班就場場滿座。講起寫書法，Andrew及叔父余鵬春都話唔識，只係讀小學時係咁意學吓。不過，Andrew笑稱自己嘅書法靚過硬筆字，因為佢啲硬筆字真係好潦草囉！國際華商協進會會長羅台秦都有到場，原來佢來自書香世家，佢爸爸羅甸服將軍寫得一手靚書法，亦精通繪畫，連國畫大師張大千都稱讚過，近年其字畫仲受到內地收藏家追捧添！
林華琴購入茶具 如獲至寶
同場仲有台灣大有製墨廠第二代陳俊天及福隆棉紙廠董事長黃國權等人，佢哋嘅手製墨條及總統府都選用嘅宣紙，將會喺香港有售，愛寫字嘅港人以後就唔使去台灣尋寶喇！鍾意尋寶嘅仲有港澳台灣同鄉會會長林華琴，佢見到由名師繪製嘅水墨牡丹花咖啡杯及白釉清花蝴蝶茶具，如獲至寶，即趁機買嚟當聖誕禮物，話要答謝裕華咁支持台灣文創產業喎。
卓妮