近日政界人士紛紛爆出「特事特辦」濫用特權醜聞，點知尋日又爆一單，有讀者投訴指由前特首董建華成立的智囊「團結香港基金」總幹事鄭李錦芬，上周六參觀位於機場禁區嘅機場控制塔，被指忘記攜帶身份證，仍獲放行。
話說上周六上午，團結香港基金等人到機場參觀控制塔，由於位處禁區範圍，進入者需預先登記個人資料同申請禁區紙，當日亦要攜帶身份證確認身份。讀者指當日鄭李錦芬冇帶身份證，職員就話攞唔到禁區紙，唔可以入禁區，但佢即時「黑面」，直指要向機管局投訴，仲話「我係董建華下屬，你唔識我都識董建華！我叫鄭李錦芬，你可以打去前特首辦公室問吓。」職員覺得驚，於是畀佢進入禁區。
團結香港基金承認鄭太當日漏帶身份證，但無提及自己係董建華下屬，或要求特殊安排，而係機管局通知，鄭太早前已提交身份證資料申辦訪客禁區證，機管局確認身份後，可按既定程序發出臨時證件。機管局發言人亦指，按既定程序，由機管局認可人員確認訪客身份，發出臨時通行證畀鄭太，由機場保安全程監控引領下參觀。