中環出更：特朗普喻CY 蔣麗芸倒米
特首梁振英（CY）民望持續插水，立法會議員林大輝尋日喺立法會上表示，香港社會嚴重撕裂，行政、立法關係空前惡劣，質疑CY未有遵守上任時嘅承諾，走入群眾聽取意見，又質疑CY上任四年以來為何仍得唔到支持。曾多次挺身撐CY嘅議員蔣麗芸（Ann）慣常幫口反駁，但竟然用美國共和黨總統候選人特朗普比喻CY，眾所周知，特朗普在美國聲名狼藉、甚至被指如當選總統會係災難，阿Ann認真倒米。
建議多啲微服出巡防衝擊
大輝喺立法會提出質詢，指政府民望長期低落，CY每次落區都遇到衝擊，關注CY會否再落區及與泛民主派溝通，又話如果政府唔去面對同處理當前問題，最後只會「無藥可救、死路一條」。阿Ann就反駁大輝話，唔同政黨有不同政見，溝通唔到亦無辦法，就如特朗普「就連自己黨都有人唔鍾意佢」。對於CY落區經常引發衝擊示威，阿Ann就建議CY可以多啲微服出巡。
負責回答呢次質詢嘅政制及內地事務局署理局長陳岳鵬就話，無論任何活動，參與者嘅安全係最重要考慮，政府會同社會及立法會各黨派溝通，努力爭取支持。
卓妮