香港社會愈來愈對立，愈來愈分化，事無大小都拗餐飽，不過有樣嘢大家都會同意，港府冇膊頭冇腰骨冇擔當，你有你群眾鬥群眾，佢有佢匿埋一邊剝花生睇好戲，咁搞法，盞火上加油嘅咋！
喺尋日一個電視論壇上，有工會代表炮轟現行強積金制度千瘡百孔，特別係對沖機制已累積沖走打工仔逾百億港元，形容對沖機制已淪為僱主「炒人備用金」，失去強積金作為退保嘅作用。估唔到嚟自商界嘅立法會議員英雄所見略同，批評港府唔應該喺對沖問題上袖手旁觀，由得勞資雙方自己拆掂；又話強積金嘅問題唔係僱主造成，而係行政收費高、回報低喎。
即係咁，取消對沖機制呢家嘢，站在打工仔角度，梗係舉腳贊成喇；之但係對於僱主嚟講，要額外承擔多一筆支出，自然牙痛咁聲。講真，家陣經濟吹淡風，唔少中小企已經吊緊鹽水，一旦取消對沖機制，分分鐘爆發結業潮，對打工仔又係咪好事呢？
點講都好喇，勞資雙方寸步不讓，始終唔係辦法。有人建議設立失業保險金，上限二萬五千元，等失業人士可以應付兩至三個月短期生活需要，預計每年開支大約十億元，當局話可以考慮喎。問題係，如果失業人士無法短期內搵到工，使晒呢筆錢，唔通一家人食西北風咩。
所以話，之所以搞成今日咁，港府縮骨卸膊難辭其咎。全民退保討論咗幾十年，社會一早有共識，港府卸得就卸，以強積金敷衍民意，事實證明強積金回報表現差到冇朋友，即使「自由行」、「半自由行」等小修小補都係無濟於事，打工仔靠佢退休，蚊都瞓蛇都死。
港大榮休教授周永新就講得啱嘞，上世紀七、八十年代前港督麥理浩管治下，先後建立社會保障網同開始興建公屋，成功阻止「資本主義醜惡一面」出現；反觀家陣香港貧富懸殊嚴重，樓價高企，年輕一代睇唔到前路，資本主義醜惡一面正陸續浮現。冇錯嘞，港府坐擁金山銀山，絕非麥理浩時代可比，點解當年港英政府做得到，特區政府做唔到？點解其他好多發達社會都有全民退保，唯獨係香港冇？雖然港府未開到口否決全民退保，但擺明傾向有資產限制嘅方案，所謂諮詢，根本就係走過場，最離譜係港府恐嚇全民退保會導致加稅，連累下一代，為咗推卸責任，不惜挑動社會貧富矛盾，世代對立，簡直離晒大譜。
講到底，打工仔退休無保障，長者生活無所依，與其話係「資本主義之惡」，不如話係「特區官僚之廢」。愈來愈多人懷念港英年代，愈來愈多人移民他鄉，依家知點解啦！