香港政府管治無能，近年來可謂亂象紛呈，令人慘不忍睹；生人霸死地市民聽得多，最佳例子莫如教育局，審計報告早前揭發，教育局記錄嘅二百三十多間空置校舍，當中有逾一百間未有使用，而部分空置校舍更被閒置近三十六年，你話住喺劏房嘅基層係咪心都翳多二錢重？講真，政府大可以搞個跨部門合作，叫發展局局長波叔規劃吓，將教育局霸住嘅空置校舍全變成劏房，平租給四年內都上唔到公屋嘅市民，咁都算係無神經政府嘅德政。
講開生人霸死地，老朽不禁諗起政府口口聲聲話本港土地供應緊張，波叔更多次搬出發展土地與郊野公園是魚與熊掌、不可兼得嘅論調。之不過，世事無絕對，香港幾荒謬嘅事都有，今年蟲蟲特別多，恐怕亦是災劫特別多；呢，勞工處前高官及多名富商涉嫌在大潭灣東丫背村佔用官地超過三十年，將寮屋改建成八座豪華獨立屋，更加建花園、玻璃屋和私家碼頭，總樓面面積八點九萬平方呎。阿哥，擁有無敵大海景、春暖花開嘅獨立屋，如今講緊係二十幾萬元一平方呎，你話成九萬平方呎值幾多十個億啊？
明朝有個叫屠隆嘅文人，佢話最理想嘅生活係：「樓窺睥睨，窗中隱隱江帆，家在半村半郭；山倚精廬，松下時時清梵，人稱非俗非僧。」傻仔，做文人你就一世都咪旨意有如此神仙生活，之但係做一個政府前高官，咁就明月清風、玻璃屋與私人碼頭可以長擁有。人生有幾多個三十年？
政府一味吹水，說甚麼房屋政策是重中之重，老朽搲晒頭，何以地政處及寮管處對於有人涉嫌佔用官地化寮屋為私人庭林別墅熟視無睹？是不是沒有被踢爆就闊佬懶理？今次前高官涉霸官地是不是又係「制度嘅錯」？是不是又係「官到無良膽自大」──冇人要問責？香港沉淪，正如老朽所講：養一班廢柴高官真眼冤！