政情：公民講場：女士夜違例否 亂陳法例

早前有娛樂場所因為舉辦Ladies Night（女士之夜），畀平等機會委員會控告違反《性別歧視條例》，娛樂場所敗訴後，事件引起社會熱議。平機會主席陳章明早前同酒吧業協會會面之後，透過立法會議員謝偉俊引述，話Ladies Night只係促銷手法，平機會唔會隨便興訟。但陳章明尋日接受電子傳媒訪問又改口話，Ladies Night係營商行為，唔會獲得豁免。幾日之間講法似乎有一百八十度轉變，一時一樣，愈噏愈亂，究竟陳章明有冇睇清楚法例點寫？抑或佢好似上任時回應傳媒有關佢漏報「秘撈」嘅風波，又係「全憑記憶」去回答？