政情：「帶路」擬打尖申撥 吳得掂當唔知
施政報告提出以十億元設立「一帶一路獎學金」，計劃惹起爭議，更有指當局為求盡早喺立法會財務委員會通過，密謀「打尖」將呢項撥款排喺公務員加薪撥款前，各方擔心做法會令「拉布」再現。教育局局長吳克儉（吳得掂）尋日出席一個活動時，就話無聽聞「插隊」呢件事。難道吳得掂扮唔知？
吳得掂話政府好希望各項措施同建議能夠喺今個立法年度通過，但有個別情況同活動要針對最新意見，特別係議員意見、社會反應，同埋當局需要多加解釋，減少誤會，據佢理解，財委會嘅議程仍未確定。被問到會唔會擔心引發「拉布」，佢就話當局會努力令各方明白多啲，希望多加解釋後，大家以學生福祉為大前提，盡量支持呢個議案。
解釋不清 竟賴誤會
佢又提到社會對「一帶一路獎學金」有誤會，撥款十億元只係本金，真正嘅支出係每年嘅投資回報，而錄取外地學生，亦完全唔會影響本地學生獲錄取嘅機會。呢項建議提出咗半年，點解仲有誤會？咪又係佢解釋得唔清楚囉！