政情：譚文豪揸鐵騎政總抗議
本身係民航機師嘅譚文豪（Jeremy）原來係電單車發燒友！佢尋日連同十位電單車司機，駕駛烈火戰車，由九龍灣遊行至政府總部，抗議電單車車位不足嘅問題。Jeremy話喺父親薰陶下，十五年前已開始揸電單車，雖然依家父親已經去世，但佢不時會揸父親留低嘅舊電單車去兜風，緬懷一下往事，仲話會鼓勵小朋友長大後學電單車，希望將揸電單車嘅嗜好一代傳一代，但就唔知太太到時批唔批准嘞！
Jeremy話作為電單車使用者，佢都好關注電單車車位不足問題，又批評目前全港有四萬七千架登記電單車，但車位只得三萬一千個，而運輸署對於車位不足嘅問題，只係以車主可以放喺私人車房，用自己方法處理作回應，真係「好離地」，所以佢發起遊行，要求政府正視。佢又話之後會着手處理停泊喺車位上，卻無牌照登記嘅「死車」佔用車位嘅問題，希望市民報料。