政情：肥佬黎大宅 五漢「拍」門
被指係前年年底違法佔領行動幕後黑手嘅壹傳媒集團前主席黎智英（肥佬黎），其大宅門口尋日下晝發生懸疑事件，五名疑似內地男子下午行經肥佬黎屋企附近，並拍攝其門口作記錄，該批男子至今身份未明，事件中最令人嘖嘖稱奇嘅係，肥佬黎竟然冇報警，反而搵咗旗下傳媒員工到場。到底呢幾個男子係警察、廉政公署人員定係內地「強力部門」呢？點解佢哋嘅出現，會令到肥佬黎寧願搵旗下傳媒，都唔相信警方呢？唔通佢都怕有一日會被帶走？
尋日下晝約兩點四十分，肥佬黎屋企附近有五名疑似中國籍男子，部分人帶住斜孭袋，衣着亦似內地人士，當中四人年約四十多至五十歲，一人約二十多至三十歲，該名較年輕嘅男子身穿螢光黃色風褸，手持藍色縮骨遮。
三人再到《蘋果》大樓外攝影
一行五人由嘉道理道嘅山腳沿斜路步行上山，其中先有四人行到嘉道理道八十七號門口，即肥佬黎屋企對面，餘下一人尾隨行至八十一號，即肥佬黎屋企門口，就掉頭落山。至於該四名男子，當中一人手持攝影機，先拍肥佬黎屋企門口，再拍攝旁邊嘅聖佐治閣外貌，其後再影多次肥佬黎屋企門口，全程約一分鐘，跟住四人就慢行落山。
至下午四時三十分，其中三人再被發現在將軍澳《蘋果日報》大樓外進行拍攝，到底呢批男子係乜嘢身份同背景嘅人？點解會有興趣拍攝肥佬黎屋企門口？至今仍然無從得知。
肥佬黎同附近住戶都冇報警，但約半小時後，肥佬黎旗下傳媒有員工到場守候，令到事件更加惹人遐想。一般市民屋企附近有可疑人物，都會報警交由警方處理，但點解肥佬黎只係搵員工，而冇搵警方？佢到底係咪驚啲乜嘢，因此唔信警方？當中係咪有啲不可告人嘅原因？答案就只有肥佬黎至知。