財政司司長曾俊華（鬍鬚曾）同民主黨（白鴿黨）「老鴿」爆密會疑雲！有讀者爆料，外號「李漢奸」嘅白鴿黨創黨主席李柱銘、該黨立法會議員何俊仁（AV仁）同鬍鬚曾，前晚先後喺香港會會所出現，質疑三人舉行秘密會面，私底下有交易。不過，雙方都否認傳聞，AV仁仲聲稱同李漢奸只係咁啱經過嗰度，但另一老鴿李永達（高達）就話同李漢奸同AV仁當晚一齊喺香港會食飯，口供「唔夾」喎，似乎有景轟。
白鴿黨早前喺撥款條例草案提交立法會審議時，罕有表態支持，更喺發言時大力吹捧鬍鬚曾，已令唔少人質疑背後有景轟。有讀者爆料，指前晚同家人喺私人會所香港會食飯時，撞見李漢奸同AV仁，之後又見鬍鬚曾入內用膳，質疑三人同時出現唔係「巧合」，而係因該黨早前支持撥款條例草案，所以密會討論可以得到乜嘢好處。
不過，AV仁接受查詢時極力否認，指前晚本來計劃同李漢奸到香港會食飯，但當時因為無位就離開，唔係同鬍鬚曾密會，亦冇見過鬍鬚曾。不過，高達就承認前晚李漢奸約佢同AV仁一齊去睇演唱會，之前就喺香港會食飯，但唔包括鬍鬚曾，仲笑稱雖然大家喺同一個地方，卻無緣相會。AV仁話冇喺嗰度食飯，但高達就話有，究竟邊個講嘅先係真？
鬍鬚曾嘅政治助理羅永聰接受查詢時就話財爺當晚同家人喺香港會食飯，只逗留咗一段短時間，並冇同白鴿黨中人會面。
卓妮