中環出更：爸B鬥手勢 郭偉強奪「彪」
父親節就到，香港青年動力協會尋日率先舉行「智叻爸B大比拼」，提早為慶祝父親節打響頭炮，會長郭偉強同副會長鄧家彪（Bill）亦有出席。話明大比併，梗係唔少得上台試一試班「爸B」手勢嘅環節啦，除咗換尿片，仲要幫道具BB着衫、餵奶、掃風同埋寫低帶BB外出前要準備嘅物品。
雖然郭偉強係新手爸爸，但咁多回合都表現唔錯，阿Bill亦不遑多讓，抱起道具BB時仲有板有眼，連姑娘都大讚佢哋抱B前有先摸一摸BB，充分表現父親嘅愛同關懷。不過去到比賽尾段，郭偉強突然出「茅招」，抱自己個真B「宏宏」出嚟，即刻贏晒，而阿Bill就輸在放咗BB喺枱面掃風，同埋將BB嘅底衫同面衫調亂咗嚟着，笑言可能小朋友大個咗，生疏咁話。
郭偉強嘅太太Myolie亦在場，問佢覺得老公算唔算一個叻爸，Myolie就笑指「中規中矩」，但好多嘢肯幫手。郭偉強就話做咗爸爸後時間唔夠用。被問到畀唔畀囝囝做議員，佢就話冇乜所謂，話相信到時已經冇人拉布喎。
阿Bill難忘囡囡初嗌爸
阿Bill就難忘有次好辛苦先氹到個女瞓覺，之後同太太坐喺廳嘅時候，囡囡突然起身行出廳搵佢哋，仲叫佢哋「爸爸媽媽」，嗰次係佢囡囡第一次咁樣走出嚟搵佢，成個畫面令佢覺得窩心又深刻。
民政事務局政助徐英偉同香港鐘表業總會顧問梁青華都有亮相，梁青華話兩個仔已經三十幾歲，當年佢換片同餵奶次數五隻手指數得晒，認為做父親最緊要幽默，仲話兒子大個仔，父親節食飯由佢哋埋單。徐英偉就話希望日後小朋友大個之後叫佢英文名，減少代溝。
卓妮