蠢人處處有，香港特別多。平機會好做唔做，早前協助一名男士控告酒吧推出「女士之夜」違反性別歧視條例，引起社會一片嘩然，尋日港府高官上立法會解畫，結果愈描愈黑，仲被議員質問到口啞啞添，簡直唔衰攞嚟衰。
一石激起千重浪，「女士之夜」被判歧視唔止引起飲食業關注，社會各界亦擔心此例一開，隨時誤墮法網。好似有議員問，商場嘅女廁數目多過男廁，係咪構成雙重標準？又有議員問，現時只有「三八婦女節」，未有「男士節」，政府可能觸犯歧視條例。至於大家從小到大被灌輸「女士優先」係紳士風度嘅表現，更加有歧視之嫌喇。面對議員群起攻之，政制及內地事務局局長譚志源都頂唔順舉手投降，叫議員遲啲問番平機會主席喎。
又難怪議員咁多質疑嘅，正如飲食界議員話齋，業界採用「女士之夜」等招徠手法，無非為咗開拓女性客源，同時吸引更多男性光顧，純粹係營銷策略。平機會濫告一餐，唔止矯枉過正，仲搞到業界冇啖好食，一旦取消「女士之夜」，酒吧生意起碼損失一半，都咪話唔大鑊。所以話，議員要求政府將業界呢類營銷手法豁免於《性別歧視條例》，唔係冇道理（口架），家陣經濟不景，好多食肆都捱唔住，好似涉案酒吧咁吖，畀平機會搞一搞，被迫關門大吉，你話平機會係咪累人累物吖？
即係咁，香港係文明社會，追求男女平等當然無人反對，之但係都要有常識吖。法律界人士就講得啱嘞，《性別歧視條例》雖然係維護人權嘅重要機制，但若無視常識及判斷力，只會引起公眾反感。咁又係呀，男士可以因為收費較貴而覺得被歧視，女士一樣可以因為收費較平而覺得被歧視嘅啫，咁搞法，爭議只會沒完沒了。
正所謂，一處鄉村一處例。好似美國咁吖，夠晒自由開放喇，夠晒男女平等喇，每個州份對「女士之夜」是否涉及歧視一樣有唔同演繹。好似華盛頓州、伊利諾州就打過相關官司，法官認為商家利用商業策略吸引女性光顧某啲場所，並不等同商家有意用高價排斥男顧客，呢啲咪叫common sense囉。美國尚且唔會一刀切，香港平機會偏偏要庸人自擾，唔添煩添亂至奇。
冇計喇，平機會本來就係政治花瓶，惟有無嘢搵嘢嚟做，顯示自己嘅存在價值。講到底，呢啲都係前主席周一嶽留低嘅蘇州屎，佢有名你叫周一鑊，梗係唔蠢嘅事唔做喇。嗱，周一鑊已經捲鋪蓋滾蛋，新主席陳章明到底會唔會撥亂反正，大家不妨拭目以待吖。