政情：玩具冇得慳 蔡加讚唔憂做
經濟不景，行行都呻生意難做，但「玩具大王」蔡志明兒子蔡加讚（Karson）就話，佢哋間玩具廠生意仍然有增長，事關無論經濟好唔好，始終都要買玩具送畀小朋友，或者氹自己開心。佢哋生產嘅玩具由洋娃娃到高科技電子玩具，款式種類包羅萬有，真係任何年齡買咩玩具，都好大機會買中佢哋啲產品。
孝敬父母 最重心意
講起父親節就到，Karson今年先至第二次過父親節，但已有三個子女陪佢過，認真威水。不過，三個小寶貝仍然好細，慶祝活動都係要太太汪圓圓花心思度橋。香港人普遍較重視母親節，Karson就話，喺佢屋企父親節一樣咁重要，但係佢父母乜都唔缺，送禮物方面都好頭痕喎？Karson話，所以最緊要係個心，佢通常跟兩位家姐一齊落廚煮飯畀父母食。原來佢識煮兩味？Karson笑笑口話，就係唔識煮，先至有心嘛！