政情：創業又行善 鴨仔有排忙
由著名工業家林亮設計嘅黃色經典鴨又再出動。尋日林亮同灣仔一間富豪飯堂成立聯營公司，齊齊推出以鴨仔為主題嘅食品及餐具，例如曲奇、朱古力、牙籤及水壺等，甚至會開經典鴨主題餐廳。林亮話，賺咗錢梗要做善事，所以佢哋同時成立「香江水暖慈善基金」，積極回饋社會。
咁大動作，林亮嘅家人梗要撐場，包括大仔兼立法會議員林健鋒及孫仔林凱章，仲有外孫陳永誠，平時好少見嘅林亮細仔林健勳兒子林仲賢（Alvin）亦有到場。Alvin原本從事時裝行業，半年前才返家族公司幫手，主力負責愈來愈忙碌嘅經典鴨。唔知未來鴨仔會唔會變得愛打扮，變成潮鴨呢？