中環出更：張國鈞知名度唔及隻企鵝
因為一句「北極人少企鵝多」而成為網絡笑柄嘅中西區區議員張國鈞，最近為提升知名度不惜玩自嘲，喺宣傳車上印上企鵝公仔，但會唔會又被隻企鵝搶風頭呢？張國鈞話，曾經喺互聯網搜尋過自己個名，發現自己個名一定會同北極企鵝一齊出現，佢自嘲北極企鵝嘅知名度可能比自己仲要高，所以將錯就錯用來做宣傳。若果有成效，唔排除廣泛應用喎。
想回復鋼條身材
張國鈞話，自從北極企鵝事件後，就緊記講嘢要謹慎，又指自己嘅普通常識其實唔差。講開呢隻企鵝，原來係朋友為佢度身訂造，改咗幾次先正式登場。另外，張國鈞最近搵咗個私人教練，希望喺三個月內減十幾磅，回復當年嘅鋼條身材。佢笑言，自從太太生咗兩女後，自己嘅身形就開始暴脹，事關太太食唔晒嘅補品都畀佢清晒，包括補身嘅雞湯、就嚟過期嘅雞精等，真係想唔增磅都幾難喇。
卓妮