政情：今日你上鏡：鄧宣宏雁發展網購谷生意

零售市道唔好，加上年輕人鍾意喺網上尋寶多過行街買嘢，令各行業愈來愈重視網購市場。太子珠寶鐘錶副主席鄧宣宏雁（Emily）都有切身體驗，佢話集團旗下鎮金店於年幾前開始拓展網購，現時初見成效，一個網店嘅收入甚至好過一間實體店，而且仍然穩步增長，所以集團將沿用呢個成功經驗調整策略，逐步推出自家珠寶於網上銷售。Emily仲話，好似佢讀緊中學嘅囝囝都識得上網買英文書同玩具，有次老師送餅乾畀囝囝食，覺得好味，於是就上網喺美國買咗六包返嚟，連佢都要寫個服字，反映年輕人嘅消費模式已改變。