政情：熊運信交棒 蘇紹聰掌律師會
香港律師會繼上月底改選理事會後，尋日亦選出新一屆正、副會長。最新出爐結果，律師會副會長蘇紹聰將接替熊運信，升呢擔任會長，而現任副會長彭韻僖成功連任，理事黎雅明則新當選副會長。本身係少數族裔嘅黎雅明，除咗係伊斯蘭金融專家，亦有擔任其他公職，包括平等機會委員會增選委員。
黎雅明新任副會長
律師會有不成文規定，會長最多做三屆，即三年就要交棒，但以往會長通常只做兩屆。值得注意嘅係，熊運信自前會長林新強喺一四年八月被拉下台後接任會長，甚少就政治敏感議題發表意見，但至今仍未做夠兩屆就卸任。雖然早前盛傳熊運信會卸任，但佢喺上月改選理事會時並無明確表態。據了解，佢打算接多啲官司，所以決定唔連任。
至於將接任會長嘅蘇紹聰就係孖士打律師行合夥人，過往不時就法律議題發表意見，唔知上任後會否一改熊運信慎言慎行嘅作風，積極就政治議題發聲呢？